चीनमा उच्चगतिको आर्थिक वृद्धि सम्भवतः अन्त्य : राष्ट्रपति सी
चीन
। चिनियाँ राष्ट्रपति सी जिनपिङले सोमबार विश्वको दोस्रो सबैभन्दा ठूलो
अर्थतन्त्रको उच्चगतिको आर्थिक वृद्धि सम्भवतः अन्त्य भएको धारणा व्यक्त
गर्नुभएको छ । धेरै अर्थशास्त्रीहरूले चीनको यसै अर्थतन्त्रका आधारमा
विश्वको अर्थतन्त्र अभिप्रेरित भइरहेको धारणा राखेका छन् ।दक्षिणी द्वीप हाइनानमा जम्मा भएका विदेशी करिब दुई दर्जन व्यापारीलाई सम्बोधन गर्दै राष्ट्रपति सीले चीनले उच्चगतिको आर्थिक वृद्धि थेग्न नसक्ने र त्यो चीनले चाहेको कुरा पनि नभएको बताउनुभयो ।
उहाँले चीनको अर्थतन्त्र राम्रो अवस्थामा रहेकाले तुलनात्मक रूपमा उच्च आर्थिक वृद्धि अझै कायम हुने सम्भावना रहेको पनि उल्लेख गर्नुभयो ।
चीनले आफ्नो अर्थतन्त्र खुला बनाएपछि औसत रूपमा ९.९ प्रतिशतको वार्षिक वृद्धिदर प्राप्त गरेको छ । राष्ट्रपति सीले यस प्रकारको आर्थिक वृद्धि विश्वको आर्थिक इतिहासमा कमै देखिने गरिएको बताउनुभयो ।
उहाँले शहरीकरण, औद्योगीकरण, तथा कृषिको आधुनिकीकरणले भविष्यमा पनि अर्थतन्त्रमा वृद्धि हुने आशा कायम रहेको बताउनुभयो ।
सी गत महिना चीनको राष्ट्रपति बन्नुभएको हो । उहाँ राजनीतिक तथा आर्थिक नेताहरूको वार्षिक भेला एसियाका लागि बोआओ मञ्चमा बोल्दै हुनुहुन्थ्यो ।
भेलाको समयमा पेप्सीकोका अध्यक्ष जेइन अब्दालाले विदेशी लगानीकर्ताले लगानी गर्ने प्रकारमा बढ्दो प्रतिबन्धप्रति चिन्ता व्यक्त गर्नुभएको थियो ।
राष्ट्रपति सीले चीनले विदेशी लगानी कम्पनीको कानुनी अधिकार तथा अभिरुचिलाई चीनले संरक्षण गर्ने बताउनुभयो । उहाँले उनीहरूको सरकारी खरिद तथा स्वतन्त्र खोजीका लागि समान सहभागिताको अधिकार सुनिश्चित गरिने पनि उल्लेख गर्नुभयो ।
उहाँले चीनले वाह्य विश्वलाई आफ्नो ढोका खुला गरेको र त्यो अब बन्द नहुने बताउनुभयो । उहाँले अन्य मुलुकले पनि चिनियाँ लगानीकर्ताका लागि आफ्नो ढोका खोल्ने आशा व्यक्त गर्नुभयो ।
चीनको ठूलो व्यापार फाइदाका कारण ऊसँग विश्वको सबैभन्दा ठूलो विदेशी मुद्रा सञ्चिति रहेको अनुमान गरिएको छ ।
सन् २०१२ मा चीनको घरेलु उत्पादन ७.८ प्रतिशतले वृद्धि भएको थियो । सन् २०१३ का लागि यस मुलुकले यसको प्रतिशत ७.५ हुने अपेक्षा गरेको छ ।
राष्ट्रपति सीले चीनले आर्थिक वृद्धिको गतिलाई रोकी वृद्धिको शैलीमा दू्रत रूपमा परिवर्तन गर्न प्रयास गरेकाले यस्तो अवस्था आएको बताउनुभयो । उहाँले चीनले अब आफ्नो विकासलाई गुणात्मकता तथा प्रभावकारिताका आधारमा हेर्ने उल्लेख गर्नुभयो ।
चिनियाँ नेताहरूले उनीहरूको आर्थिक शैलीलाई लगानी तथा निर्यातमा भन्दा पनि उपभोक्ताको मागमा आधारित बनाउन प्रयास गर्ने बताएका छन् ।
सन् २००१ देखि बोआओ मञ्चले एसिया तथा अन्य क्षेत्रका सरकार, व्यापारिक समुदाय तथा वौद्धिक नेताहरूको भेला गराउँदै आएको छ । एएफपी
How about this Article
No comments: