एमाले भतिर्केन्द्र बन्यो सरकारी सञ्चार माध्यम

काठमाडौँ, ३१ असार । आफूलाई स्वतन्त्र र निष्पक्ष दाबी खिलराज सरकारका प्रवक्ता एवम् सूचना तथा संचारमन्त्री माधव पौडेलले सरकारको मुखपत्र मानिने सरकारी संचार माध्यमलाई एमाले पार्टीको मुखपत्र बनाउने तथा संचार मन्त्रालयलाई एमालेको भतिर्केन्द्र बनाएका छन् । 

यसअघि दलकै नेता संचारमन्त्री हुँदासमेत यति नांगो ढंगले सरकारी सञ्चार माध्यममा पार्टीकरण हुन सकेको थिएन, तर अहिले त स्वतन्त्र सरकारका स्वतन्त्र मन्त्रीले एउटा पार्टीको निर्णय र निर्देशनमा काम गरेपछि सरकारको कथित स्वतन्त्रताको धज्जी उडेको छ । पौडेल सञ्चरमन्त्री भएको केही दिनमै एमाले सदस्य रहेका पत्रकार मातृका पौडेललाई प्रेस सल्लाहकार बनाएर एमालेकरणको यात्रा सुरु गरेका थिए । उनले सञ्चार, सामान्य प्रशासन र शिक्षा मन्त्रालयका निजी सचिवालयमा पनि एमाले कार्यकर्ता मात्र नियुक्ति गरेका छन् । 

सञ्चारमन्त्रीको पहिलो प्रहारको निशाना गोरखापत्र संस्थान बन्यो । उनले गोरखापत्रको प्रधानसम्पादक रहेका वरिष्ठ पत्रकार सीताराम अग्रहरीलाई हटाएर एमाले समर्थक पुस्कर माथेमालाई प्रधान सम्पादक नियुक्ति गर्न लगाए । गोरखापत्रको बोर्ड सदस्य रहेका मधेशी पत्रकार संघका केन्द्रीय अध्यक्ष कुमार विवेकानन्द मिश्रलाई हटाएर एमाले प्रचार विभाग सदस्यसमेत रहेका प्रेस चौतारीका निवर्तमान उपाध्यक्ष श्रीधर आचार्यलाई नियुक्त गरे । त्यसैगरी  मुकायम महाप्रबन्धकमा एमाले समर्थक कपिल घिमिरेलाई नियुक्त गरियो । अहिले गोरखापत्रमा बाहिरवाट जीएम नियुक्ति गर्ने खेल भइरहेको छ । अर्थमन्त्री शंकर कोइरालाले सबै एमालेका मात्रै नियुक्ति गरियो आफ्ना मान्छे सुशील कोइरालालाई गोरखापत्रको जीएम बनाउनुपर्छ भनेपछि फाइल मन्त्रिपरिषदमै रोकिएको छ । गोरखापत्रमा अहिले विभिन्न जिल्लाका संवाददातालाई हटाएर एमालेका कार्यकर्तालाई नियुक्ति गर्ने क्रम जारी छ । 

अर्को सरकारी सञ्चारमाध्यम रेडियो नेपालमा पनि सञ्चारमन्त्रीको ठाडो निर्देशनमा महेश चौरसियासहितका घटना र विचार कार्यक्रम संचालन गरिरहेका पत्रकारलाई हटाइएको छ । घटना र विचार सञ्चालन भएकै समयमा एमाले पत्रकारको नयाँ टिम पठाएर गन्तव्य संविधानसभानामक कार्यक्रम संचालन गरिएको छ । प्रेस चौतारीका महासचिव माधव नेपालसहितका एमाले पत्रकारहरुले चलाएको यो कार्यक्रम एमालेको प्रशंसा र एमालेबाहेक दलको विरोधमा सञ्चालन हुन्छ । सञ्चारमन्त्रीले रेडियो नेपालको सञ्चालक समितिमा पनि एमाले पत्रकारलाई नियुक्त गर्न खोजिरहेका छन् भने कार्यकारी निर्देशकलाई पदबाट हटाउन बहानाबाजी खोजिरहेका छन् । 

नेपाल टेलिभिजनमा पनि सञ्चारमन्त्री पौडेलले एमाले सञ्चार इलाका सचिव पत्रकार टंक पन्तलाई सञ्चालक समिति सदस्यमा नियुक्ति दिएका छन् । त्यस्तै रासस, चलचित्र विकास बोर्ड र सेन्सर बोर्डमा पनि एमाले निकटकालाई भर्ती गर्ने तयारी भइरहेको छ । उता पत्रकार महासंघका पूर्वउपाध्यक्ष गोविन्द आचार्यको कार्यकाल सकिएपछि खाली रहेको न्यूनतम पारिश्रमिक निर्धारण समितिमा पनि एमाले सम्वद्ध व्यक्तिलाई मात्र नियुक्ति गर्ने तयारीमा सञ्चारमन्त्री लागेका छन् ।

 नेपाल पत्रकार महासंघका पूर्वउपाध्यक्ष समेत रहिसकेका पूर्वाञ्चलका वरिष्ठ पत्रकार कौशल चेम्जोङलाई अध्यक्ष बनाउनु पर्ने माग एमाले निकटका पत्रकारहरुले गरे पनि संचारमन्त्री पाण्डे एमाले अध्यक्ष झलनाथ खनाल र वरिष्ठ नेता केपी ओलीसित साखुल्ले बन्न खेम भण्डारी र गगन विष्टमध्ये एकलाई नियुक्ति गर्ने तयारीमा छन् ।

माधव पौडेल सञ्चामन्त्री भएपछि गरेका सबै नियुक्तिमा उनले एमालेबाहेक एक जना पनि परेका छैनन् । यसरी आफूलाई स्वतन्त्र बताउने सरकारका मन्त्रीले सरकारी सञ्चार माध्यमलाई एउटा पार्टीको भर्तीर्केन्द्रका रुपमा बदल्दा पनि उच्चस्तरीय राजनीतिक समिति र सरकारका अध्यक्षको ध्यान नजानु बिडम्वनाकै विषय बनेको छ ।