बाबुरामको अनुपस्थितिमा एमाओवादीको बैठक पदत्यागको निर्णय फिर्ता लिन अधिकांशको सुझाव

३१ असार, काठमाडौं । एकीकृत नेकपा माओवादीका केन्द्रीय पदाधिकारीसहित विभिन्न विभाग र ब्यूरो इञ्जार्जहरुको बैठक सोमबार दिउँसो पेरिसडाँडामा सम्पन्न भएको छ । प्रचण्ड र नारायणकाजी श्रेष्ठ समेतको सहभागिता रहेको वैठकमा डा. बाबुराम भट्टराईको भने उपस्थिति थिएन ।

बैठकमा मजदुर नेता शालिकराम जम्मकट्टेल, पुष्मविक्रम मल्ल, झक्कु सुवेदी, अन्तरराष्ट्रिय विभागका सदस्य युवराज चौलागाईलगायत करिब आधा दर्जन नेताहरुले डा. बाबुराम भट्टराइएको त्यागपत्रबारे कुरा राखेको बैठकमा सहभागी एक नेताले अनलाइनखबरलाई बताए । पार्टीभित्र उत्पन्न समस्यालाई कसरी समाधान गर्ने भन्नेबारे छलफल गर्न आयोजित बैठकमा बोल्ने अधिकांशले विना छलफल डा. भट्टराईले पद त्याग गर्न नहुने प्रतिक्रिया दिएका थिए ।

मंगलबार पूर्वस्थायी समितिका नेतासहित राज्य इञ्जार्ज र ब्यूरो प्रमुखहहरुको बैठक बस्ने स्रोतले अनलाइनखबरलाई बतायो । साउन ४ गतेका लागि बोलाइएको विस्तारित बैठकको तयारीका क्रममा नेतृत्वले विभिन्न तहशमा बैठक आयोजना गरेर सुझाव संकलन जारी राखेको छ ।

बाबुराम भट्टराईले गरेको पदत्यागको निर्णयलाई सदर गर्ने कि उहाँलाई पुनः जिम्मेवारीमा फर्काउने भन्नेबारे एमाओवादीभित्र तिब्र छलफल चलिरहेको छ । विभिन्न तहबाट सुझाव लिएपछि विस्तारित बैठकअगावै यो विषयलाई टुंगो लगाउने तयारीमा माओवादी नेतृत्वले गृहकार्य गरिरहेको छ ।