एक लाख ४४ हजारले पाए मेगा बैंकको सेयर, साना लगानीकर्तालाई ६.३१ र ठूलालाई ३.६७ प्रतिशत सेयर पर्यो
३० असार, काठमाडौं । मेगा बैंकले
सर्वसाधारणमा जारी गरेको ६९ करोड ९० लाखको सेयर आज बाँडफाँट गरेको छ ।
बैंकले साना लगानीकर्तालाई ६ दशमलव ३१ प्रतिशत र ठूला लगानीकर्तालाई ३
दशमलव ६७ प्रतिशतका दरले सेयर बाँडफाँड गरेको हो । बैंकको साधारण सेयरमा
माग गरिएभन्दा २२ दशमलव २५ गुणा बढी आवेदन परेको थियो । बैंकले गत जेठ १९
गते ६९ करोड ९० लाख रुपैयाँ बराबरको साधारण सेयर निस्कासन गरेको थियो ।
बैंकले सेयर बिक्री खुला गरेको ३९ दिनमा बाँडफाँट गरेको हो ।
सेयरका लागि परेको एक लाख ६० हजार ५ सय २४
आवेदनमध्ये १ लाख ४४ हजार ४ सय ५६ जनाले मेगाको सेयर प्राप्त गरेका छन् ।
यद्यपि परिवारको नाममा भएका सेयर पछि एकीकृत गरिने हुँदा सेयरधनीको संख्या
घट्नेछ । आवेदन दिएमध्ये २ सय २८ जनाको एक लाख २० हजार ४ सय ३७ कित्ता सेयर
आवेदन रद्द भएको छ । बैंकले साधारण सेयरमध्ये ५ प्रतिशत कर्मचारी र ५
प्रतिशत म्युचुअल फण्डलाई छुट्टाई जारी गरेको ६२ करोड ९१ लाखको सेयरमा २२
अर्ब रुपैयाँको आवेदन परेको थियो ।
साना लगानीकर्ताको अत्यधिक आवेदन परेपछि
बैंकले चिठ्ठामार्फत छनोट गर्दा सबै आवेदकले सेयर पाएका छैनन् । बैंकका
अनुसार ५० कित्ता शेयरका लागि ११ हजार ३ सय ३६ जनाले आवेदन दिएकोमा
चिठ्ठामार्फत ३ हजार ४ सय ७४ जनाले सेयर प्राप्त गरेका छन् । एक सय ५०
कित्ता सेयरका लागि ३ हजार ५ सय ९ जनाले आवेदन दिएकोमा जम्मा ३ हजार २ सय
२५ जनाले मात्र सेयर प्राप्त गरेका छन् । धितोपत्र बोर्डको नियमअनुसार १५०
कित्ताभन्दा कम आवेदन गर्नेलाई ४० प्रतिशत सेयर बाँडफाँट गर्नुपर्छ ।
त्यसमध्ये सबै आवेदकलाई सेयर बाँडफाँट गर्दा १० कित्ताभन्दा कम पर्ने भएपछि
चिठ्ठामार्फत कम्तीमा १० कित्ता पाउने गरी सेयर बाँडफाँट गरिएको थियो ।
१५० कित्ताभन्दा कम आवेदन गर्ने सबैलाई १० कित्ताको दरले सेयर दिइएको छ ।
ठूला लगानीकर्ता सबैले आवेदनको अनुपातअनुसार सेयर प्राप्त गरेका छन् ।
सबैभन्दा बढी २ लाख कित्तामाथि आवेदन गर्नेले ७ हजार ३ सय कित्ता सेयर
पाएका छन् । त्यस्तै, एक लाख आवेदन गर्नेले ३ हजार ६ सय ५३ कित्ता र ५०
हजारको आवेदन गर्नेले १ हजार ८ सय २५ कित्ता सेयर पाएका छन् । यसैगरी
विभिन्न रेञ्जमा सेयर बाँडफाँट गरिएको छ ।
मेगा बैंकमा परेको अधिक आवेदनले आफ्नो
बैंकमाथि जनताको असाधारण विश्वासलाई दर्शाएको अध्यक्ष डा. मदन दाहालले
बताउनुभयो । ‘सफलतापूर्वक साधारण सेयर बिक्री गरेपछि बैंकले एउटा अध्याय
पूरा गरेको छ’, उहाँले भन्नुभयो, ‘अब हाम्रो ध्यान बैंकको सुदृढीकरण र
विस्तारमा केन्दि्रत रहनेछ ।’
१२ सय १९ जना प्रमोटर रहेको बैंकको चुक्ता
पुँजी साधारण सेयरपछि २ अर्ब ३३ करोड रुपैयाँ पुगेको छ । स्थापनाको तीन
वर्षमा बैंकले १२ अर्ब निक्षेप संकलन गरी ११.५ अर्ब कर्जा प्रवाह गरेको छ ।
२८ वटा शाखा र ४५ स्थानमा शाखारहित सेवा दिएको यस बैंकले शाखा संख्या ५०
पुर्याउने योजना बनाएको छ ।
मेगामा परेको आवेदनले नेपालमा कनै पनि
परियोजना सञ्चालनको लागि पुँजीको समस्या नपर्ने स्पष्ट भएको कार्यकारी
प्रमुख अनिल केशरी शाहले बताउनुभयो । ‘नेपालमा कमी पुँजीको होइन विश्वासको
हो भन्ने हामीले पुष्टि गरेका छौं’, उहाँको भनाइ थियो, ‘जनताको विश्वास भए
जति ठूलो परियोजनामा पनि पुँजी सजिलै जुटाउन सकिन्छ ।How about this Article
No comments: